香港新浪網 MySinaBlog 精選話題工具
« 上一篇 | 下一篇 »
Jazzf | 18th Jul 2013, 22:41 PM | Jazzf | (966 Reads)

   自從港交所開埋夜晚五點至十一點期指後,六個鐘既成交加埋低過開市時段既六分鐘,有時上落重要得三幾十點上落,淡市真係只可以睇下書、上下網解悶,投資既書日又睇夜又睇始終會累,所以自從上次你地介紹男人唔可以窮之後,每次悶市都會上高登睇下故仔,順便同作者傾下計昆水吹,經過一輪選擇後今日就推介兩本「會展可留意書」比大家。
PicturePicture
  首先飛哥寫既港女故入面有三個故事,簡單一句說話第一篇係為囡欠債、第二篇被囡玩,為免劇透就講個係朋友圈聽返黎類似既故事,我諗唔理男女有試過同真正「港女」去旅行應該都知道係幾大獲既一件事,我聽過最精彩既「港女」旅行故,係成班朋友旅行訂好晒套票分晒房,其中一晚就去夜店玩完女仔A就要帶左個台仔返酒店(其實本身好少事,如果有兄弟帶台妹一定讚,但係咪應該自己開間房玩先...?),結果女仔B被迫去男仔房訓(都可以算),房中有一個男仔做兵追左女仔A幾年以為終於得米,結果灰爆機。(自願服兵役..)第二朝阿A叫阿B返去訓果時,但佢驚見BLOODY MARY IN THE BED...OMG...

  故事入面有更奇怪既故事比上面個故仔再入肉好多,我一買完就送左比老虎睇,佢睇完第一個故事評語就係:「真係影衰晒我地,一路睇一路想打死個女仔。」但有一點唔好誤會呢本書,佢唔只係單純想數臭港女咁簡單,全書最精彩既係最後一篇故事講飛哥娶基督徒女友,果D教友點離間佢地又搞到連屋企祖宗神主位都要掉埋,最後真係出晒計仔先娶到老婆,如果有認識極端基督徒又或者同另一半有過信仰衝突既朋友,一定會好鐘意睇又或者想防止屋企老虎病發就應該學我咁,買完就拿拿聲比老虎睇等佢知道做「港女」係幾令人煩惱。
(本人讀五年基督教中學,十個同學有六、七個係基督徒,以非教徒角度睇覺得寫得好到位。)

  第二本想推介既書就係柏原寫既後香港小男人網上日記,一開始比呢本書吸引唔係佢既內容,而係佢記錄既方法WEEK1 MON, TUE...覺得好似同我寫DAY1,DAY2同一樣野咁,唔知大家有冇寫日記既習慣,除非非常熱愛呢一件事,如果唔係每日、每星期一點一滴去記錄真係一件非常困難同麻煩既事,呢個故事係記錄一個三十歲既香港廣告界毒男,有關愛情與麵包同生活點滴既故事,畢業前SARS、金融風暴、中港融合北上傾生意,可能因為小男人周記唔知點解一路睇呢個故仔既時候就一路諗如果拍成電影會點選角,最後我覺得最完美既名單:(由出場排先後次序)
阿賓:余文樂 Phoebe:薜凱琪 Phoebe細佬:大隻謙 
Eric:馮德倫 Jimmy:曾國祥 Vivian:陳逸寧 
Henry:谷德昭  Suki:Dada 賓爸:發哥 
Phoebe上司:林家棟 Kit:林嘉欣 Mandy:谷祖琳
阿MAN:羅天宇 小吉:陶佳 張總:劉樺 
王總:吳秀波 Cindy:香香 阿偉:阿恭

  阿賓爸係成本書既亮點,作為發哥超級FANS真係諗唔到一個比佢更好既演員做到,阿賓、ERIC呢個組合第一次睇既時候係諗緊房祖名、李冶廷,但係買書睇完外傳後又覺得李冶廷未必演到eric咁老練既感覺,諗諗下如果外傳既讀白由馮德倫讀一定好正,再加上偷吻個印象實在太深,如果做Eric一定好搞笑,之但咁又帶出另一個問題,就係房祖名配馮德倫又好似顯唔出eric係矮少少同年紀一樣,咁再諗諗如果型男余文樂演毒男再同發哥做兩父子就正啦,而最鐘意既JANET就留白等你地睇完書討論下似邊個啦。

  兩本都係書展泛華發行攤位(Hall 1 綜合館1A-D16),祝兩位本書都賣到改版再改版。(數已找)


[7]

YES!!


[引用] | 作者 Jazzf | 20th Jul 2013 15:55 PM | [舉報垃圾留言]

[6]

男人唔可以窮拍電影版喎~


[引用] | 作者 Car | 19th Jul 2013 19:58 PM | [舉報垃圾留言]

[5]

如果特登去會展,我都想去買小姓奴本一獄一世界。

Jazzf
[引用] | 作者 Jazzf | 19th Jul 2013 11:19 AM | [舉報垃圾留言]

[4] Re: Roy
Roy :
男人唔可以窮出左二,第二集好唔好睇先?

可能第一集比我既感覺太好,第二集唔知係預望過高定點,我追左1/3就停左等出晒先係紙言睇,同埋內容同TVB劇本差不多。


[引用] | 作者 Jazzf | 19th Jul 2013 11:16 AM | [舉報垃圾留言]

[3]

男人唔可以窮出左二,第二集好唔好睇先?


[引用] | 作者 Roy | 19th Jul 2013 11:06 AM | [舉報垃圾留言]

[2]

特別係港女故,記得比你老虎睇


[引用] | 作者 Jazzf | 19th Jul 2013 00:44 AM | [舉報垃圾留言]

[1]

上次果本幾好睇,呢兩本見到都買黎睇下先。


[引用] | 作者 Car | 18th Jul 2013 23:06 PM | [舉報垃圾留言]